НҮБ-ын Хүүхдийн сангийн Монгол дахь суурин төлөөлөгч Эваристе Коуасси-Комланаар ахлуулсан 6 хүний бүрэлдэхүүнтэй баг Сэлэнгэ аймагт 2025 оны 01 сарын 09, 10-ны өдрүүдэд ажиллалаа. Энэ үеэр аймгийн Эрүүл мэндийн газар, Нэгдсэн эмнэлэг, Зоонозын өвчин судлалын төв зэрэг газруудын үйл ажиллагаатай танилцаж, Хүүхэд, нярайн тасгийн тусламж үйлчилгээний тогтвортой байдлыг хангах чиглэлээр мэдээлэл технологийн компьютер мөн бусад тоног төхөөрөмж хүлээлгэн өгсөн бол аймгийн Нэгдсэн эмнэлэгт НҮБ-аас хэрэгжүүлсэн хог хаягдлын автомат тоног төхөөрөмжүүдийн үйл ажиллагаатай газар дээр нь танилцаж ажилласан байна.
Мөн Зоонозын өвчин судлалын төвөөр орж, өмнө нь суурилуулаад байсан хог хаягдлыг устгах үйлдвэрийн төхөөрөмжийг үзэж шаардлагатай засвар үйлчилгээ хийх баг томилон ажиллуулах талаар ярилцсан байна.
НҮБ-ын Хүүхдийн сангийн Монгол дахь суурин төлөөлөгч Эваристе Коуасси-Комлан манай аймагт ажиллах үеэрээ аймгийн Нэгдсэн эмнэлгийн нярайн тасагт нэн шаардлагатай тоног төхөөрөмжөөр хангах, эрүүл мэндийн тусламж үйлчилгээний чанар хүртээмжийг нэмэгдүүлэх зорилгоор бүх шатны эрүүл мэндийн байгууллагуудыг алсын зайн оношилгооны тоног төхөөрөмжөөр хангах, папиллома вирусийн эсрэг дархлаажуулалтын хамралтыг сайжруулах, Зоонозын өвчин судлалын төвийн лабораторийг “Био аюулгүй ажиллагааны 2-р зэрэглэлийн лаборатори” болгох чиглэлээр дэмжиж хамтран ажиллахаа илэрхийллээ.
Сэлэнгэ аймгийн Эрүүл мэндийн салбарын тусламж үйлчилгээг сайжруулахад чин сэтгэлээ зориулж хамтран ажилласан НҮБ-ын Хүүхдийн сангийн хамт олон болон Монгол дахь суурин төлөөлөгч Эваристе Коуасси-Комлан танд ажлын амжилт хүсэж чин сэтгэлийн талархал илэрхийлье.
