Өрлөг төрийнхөө хойморыг эзэлж, өргөн түмнийхээ хийморийг тэтгэсэн Сэлэнгэ сайхан нутгийнхаа эрүүл энхийн үйлсийн өнгөрснийг бадруулж, өнөөг тодруулж ирээдүйд бэлтгэж яваа ахмад үе, алдар цуутнууд, өнөөдрийг байгуулагчид, ирээдүйн залгамжлагчид, та бүхэндээ жаран алгасаж, зуун дамнасан 90 жилийн түүхтэй Сэлэнгэ нутгийн эрүүл мэндийн салбартай нэгэн үзүүрт сэтгэлээр холбогдон түүхийг бүтээлцэж буйд талархан мэндчилье.

Эрүүл мэндийн салбар гэдэг бол бэрхшээл саадыг бие сэтгэлээрээ даван туулж, хүн ардынхаа төлөө дэндүү их хайр, тэвчээр, эр зоригтойгоор алхаж чаддаг, цэхэлж жагсах байлдагч шиг, цэнхэрлэн харагдах уулс шиг мөнхийн ариун үйлстнүүдээс бүрдсэн алба юм.

Бид "Алсын хараа-2050" Монгол Улсын урт хугацааны хөгжлийн бодлогын хүрээнд “Эрүүл дадал хэвшилтэй, идэвхтэй амьдралын хэв маягтай иргэн”-ийг төлөвшүүлэн эрүүл мэндийн чанар, хүртээмжийг сайжруулах, нотолгоонд суурилсан орчин үеийн оношлогоо, эмчилгээ,  технологийн шинэчлэл, хиймэл оюун ухаанд суурилсан эрүүл мэндийн тусламж, үйлчилгээг орон нутагтаа нэвтрүүлэхээр зорьж, өдөр бүр хичээн ажиллаж байна.

Манай аймгийн Эрүүл мэндийн салбар их эмч 209, эмнэлгийн болон техникийн тусгай мэргэжилтэй 243, сувилагч 292 нийт 1196 гаруй ажилтнууд цаг наргүй, хөдөлмөрлөж, сэтгэл зүтгэлээ Сэлэнгэ түмэндээ зориулж байгааг тэмдэглэн хэлэхэд таатай байна.

Энэхүү цахим хуудсаар дамжуулан мэргэжил нэгт нөхөд, ард иргэдтэйгээ өдөр бүр уулзаж, мэдээ мэдээллийг цаг алдалгүй хүргэх болсон нь бидэнд эргээд олон хүний оюуны хүч, сэтгэлийн дэм, урам зориг, ухаарал авчрах завшаан юм. Сэлэнгэ аймгийн Эрүүл мэндийн газрын цахим хуудсанд тавтай морилно уу. Та бүхэнд эрүүл энх сайн сайхан бүхнийг хүсэн ерөөе.

ЭРҮҮЛ МЭНДИЙН ГАЗРЫН ДАРГА,

ЭРҮҮЛИЙГ ХАМГААЛАХЫН ГАВЪЯАТ АЖИЛТАН               Ж.ОД