2024 оны 12 дугаар сарын 24-ний өдөр Сэлэнгэ аймгийн Хүдэр суманд Хүний папиллома вирус /ХПВ/-ийн халдварын эсрэг вакцин хийлгэсэн хүүхдийн нүүр, гараар тууралт гарч, халуурсан гэх мэдээлэл 12 дугаар сарын 23-ны өдөр олон нийтийн сүлжээнд нийтлэгдсэний дагуу Эрүүл мэндийн газрын даргын өгсөн үүрэг чиглэлийн хүрээнд Нийгмийн эрүүл мэндийн төв /НЭМТ/-ийн даргаар ахлуулсан ажлын хэсэг, тодруулбал аймгийн Нэгдсэн эмнэлгийн хүүхдийн болон арьсны эмч, холбогдох мэргэжилтнүүдийн бүрэлдэхүүнтэйгээр 2024 оны 12 дугаар сарын 24-ны өдөр тухайн суманд ажилласан.
Орон нутагт ажилласан нарийн мэргэжлийн эмч нарын баг тууралт гарсан хүүхдийн биеийн байдлыг асран хамгаалагчийг байлцуулан (ээж) үзлэг хийж үнэлэхэд вакцин хийхтэй давхцаж илэрсэн өвчлөл байсныг тогтоож, эмчилгээ, асаргааны талаар зөвлөмж мэдээллээр хангасан. Мөн вакцин хийгдсэн өдөр халуурсан шинж тэмдэгтэй гурван хүүхдийг хүүхдийн нарийн мэргэжлийн эмчид үзүүлэх талаар асран хамгаалагч нартай холбогдоход хоёр хүүхдийн биеийн байдал хэвийн үзлэгт орох шаардлагагүй гэсэн тайлбар өгсөн ба үлдсэн нэг хүүхэд нь үзлэгт ороход хоолой улайлттай байсанд асран хамгаалагчид эмчийн зүгээс эмчилгээний зөвлөгөөг өгч ажилласан.
Тухайн өдөр буюу 2024 оны 12 дугаар сарын 23-ны өдөр Хүдэр сумын ерөнхий боловсролын сургуулийн 15 сурагчдыг Хүний папиллома вирусийн эсрэг товлолын дархлаажуулалтанд хамруулснаас цахим орчинд олон нийтэд мэдээлэл түгээгдсэн нэг хүүхэд болон дархлаажуулалтын дараа халуурсан гэх 3 хүүхдээс бусад хүүхдүүдэд ямар нэгэн шинж тэмдэг илрээгүй байна.
Мөн ажлын хэсэг 2024 онд ХПВ-ийн халдварын эсрэг вакцинд хамрагдах 11 настай хүүхдүүдийн эцэг, эх, асран хамгаалагч нартай уулзаж дархлаажуулалтын тухай хууль, төрөөс баримталж буй бодлого эрх зүй, вакцины мэдээлэл, ач холбогдлын талаарх сургалтыг хийж мэргэжил арга зүйгээр хангаж ажилласан болно.
Дархлаажуулалтын талаарх тандалт судалгаа үргэлжилж байна.
Хавдрын өвчлөл нь нас, хүйс харгалзахгүй, тиймээс урьдчилан сэргийлэх нотолгоонд суурилсан арга хэмжээнд анхаарал хандуулах цаг нь болсон.
Хавдаргүй ирээдүйн төлөө хамтдаа.
