“Сувилагч тандаа баярлалаа-2026” улсын зөвлөгөөнд Сэлэнгэ аймгаа төлөөлөн 10 сувилагч, тусгай мэргэжилтнүүд оролцлоо.

Монгол Улсын Ерөнхийлөгчийн ивээл дор зохион байгуулагдсан “Сувилагч тандаа баярлалаа-2026” улсын зөвлөгөөн Төрийн ордонд зохион байгуулагдлаа.

Олон улсын сувилагчдын өдрийг энэ жил “Цогц чадамж – Сувилагчийн үнэ цэн” уриан дор тэмдэглэж өнгөрүүлсэн нь "Сувилагч" мэргэжилтний мэдлэг, ур чадвар, ёс зүй, харилцаа хандлага, тасралтгүй  хөгжлийг цогцоор нь үнэлж, тэдний оруулж буй хувь нэмэр, үнэ цэнийг тодотгож байгаагийн илрэл юм.

Эрүүл мэндийн сайд Э.Батшугар “Сувилагч тандаа баярлалаа-2026” улсын зөвлөгөөнийг нээж , сувилагчдын хөдөлмөрийг бодитой үнэлж, нийгмийн баталгааг ханган ажиллана гэдгийг онцлов.

Мөн Монгол Улсын Ерөнхийлөгч У.Хүрэлсүх зөвлөгөөнд оролцож, сувилагч нарт баяр хүргэж, амжилт хүслээ. Тэрээр цар тахлын он жилүүдийг хохирол багатай даван туулж, олон мянган хүнийг эмчлэн, амь насыг нь аврахад эрүүл мэндийн салбарынхан, тэр дундаа сувилагч нарын хүчин зүтгэл асар их байсныг хэлж, ард түмний нэрийн өмнөөс талархал илэрхийллээ.

Төрийн тэргүүний бодлого, үйл ажиллагаа, санаачилсан хөдөлгөөн, хөтөлбөр, түүний дотор “Эрүүл монгол хүн” хөдөлгөөнийг үр дүнд хүргэхэд эрүүл мэндийн салбар, ялангуяа сувилагч нарын мэдлэг, ур чадвар, хамтын ажиллагаа, манлайлал чухал үүрэг гүйцэтгэж байгааг онцоллоо.

Зөвлөгөөний үеэр эрүүл мэндийн салбарт олон жил үр бүтээлтэй ажиллаж, хүн ардын эрүүл мэндийн төлөө үнэтэй хувь нэмэр оруулсан ажил үйлсээрээ хамт олноо манлайлсан зарим эрхмүүдэд төрийн дээд одон медаль гардууллаа.

Зөвлөгөөнд оролцогч Сэлэнгэ аймгийн Ерөө сумын Бугант тосгоны Эрүүл мэндийн төвийн сувилагч Д.Цэцэгмаа нь Монголын сувилагчдын нийгэмлэгийн ард түмний талархал  хүлээсэн “ГАВЬЯАТ СУВИЛАГЧ“  хүндэт тэмдгээр  шагнагдсанд баяр хүргэж, эрүүл энх, аз жаргал, ажлын өндөр амжилтыг хүсэн ерөөе.

Энэхүү арга хэмжээ нь сувилагчдын үнэтэй хөдөлмөр, хүн ардын эрүүл мэндийн төлөөх хичээл зүтгэлийг алдаршуулж, мэргэжлийн хөгжил, туршлага солилцоог дэмжсэн онцгой үйл явдал болж өнгөрлөө.

Эх сурвалж: Хяналт, шинжилгээ, үнэлгээ мэдээллийн хэлтсийн албан хаагч Т.Болормаа 

Утас: 99494841