"Тийм ээ! Бид сүрьеэг устгаж чадна: Амлалтаа хэрэгжүүлье, хөрөнгө оруулъя, үйлчилгээг хүргэе" уриан дор нэгдэж байна.
Сүрьеэ нь амь насанд аюултай арван өвчний нэг бөгөөд Дэлхийн эрүүл мэндийн байгууллагын судалгаагаар Монгол Улс сүрьеэгийн тархалт, сүрьеэгийн өвчлөлөөс шалтгаалсан нас баралт ихтэй Номхон далайн баруун бүсийн долоон орны тоонд оржээ.
Манай улсад жилд дунджаар 4000 гаруй сүрьеэгийн шинэ тохиолдол бүртгэгдэж байна. Үүний арван хувь нь хүүхдэд тохиолдож буй бөгөөд нийт өвчлөгсөдийн 70 хувь нь хөдөлмөрийн буюу 16-45 насныхан байгаа юм.
Жилд 200 орчим хүн энэ өвчнөөс болж хорвоогийн мөнх бусыг үзүүлж, зөвхөн 2016 онд 2380 хүн хөдөлмөрийн чадвар алдалтын улмаас группт орсон байна.
Манай аймгийн хэмжээнд сүүлийн 5 жилийн дунджаар 94 шинэ тохиолдол бүртгэгдэж байгаа бөгөөд бусад аймгуудтай харьцуулахад өвчлөл өндөр хэвээр байна.
Жилээс жилд сүрьеэгийн шинэ тохиолдлын тоо буурч байгаа хэдий ч хүндрэл, дахилт, олон эмэнд дасалтай сүрьеэгийн тохиолдол өсөж байгаа нь анхаарахгүй орхиж болохгүйг сануулж байгаа юм.
Эрүүл мэндийн салбарын эмч, эмнэлгийн мэргэжилтэн болон сүрьеэгийн эсрэг тэмцэж буй хүн бүрийн хичээл зүтгэлд талархал илэрхийлье.
Сүрьеэгүй ирээдүйн төлөө бид хамтдаа.
