Сэлэнгэ аймгийн Эрүүл мэндийн газрын даргын 2025 оны 03 дугаар сарын 14-ний өдрийн А/14 тоот тушаалыг үндэслэн хамтын ажиллагааны хүрээнд “Гэмтэл, согогийн тусламж, үйлчилгээнд үнэлгээ хийх” баг манай аймагт хоёр өдөр ажиллалаа.
Тодруулбал, МУ-ын Засгийн газар, Эрүүл мэндийн яам, аймгийн Засаг даргын 2024-2028 оны үйл ажиллагааны хөтөлбөрт “Бүсчилсэн хөгжлийг дэмжиж төвлөрлийг сааруулах, лавлагаа шатлалын эмнэлэгт хийгдэж буй эмнэлгийн тусламж үйлчилгээг орон нутагт нутагшуулах" зорилготой 3 чиглэл бүхий 21 ажил, арга хэмжээг аймгийн Эрүүл мэндийн газар бодлого болгон боловсруулж, улмаар гурав дахь шатлалын эмнэлгүүдтэй хамтран ажиллах гэрээний хүрээнд гуравдугаар сарын 20, 21-ний өдрүүдэд Гэмтэл согог судлалын үндэсний төв /ГССҮТ/-ийн эмч, мэргэжилтнүүдийн баг манай аймагт ажиллаж, “Гэмтэл, согогийн тусламж, үйлчилгээнд үнэлгээ хийх” мөн “Осол гэмтлийн үед үзүүлэх яаралтай тусламжийн менежмент” сэдвээр аймаг сумын Нэгдсэн эмнэлэг, өрх, сум, тосгоны Эрүүл мэндийн төвийн эмч нарт онол, дадлага хосолсон сургалт зохион байгууллаа.
Сэлэнгэ аймаг Гэмтэл согог судлалын үндэсний төв /ГССҮТ/-тэй хамтарч ажилласнаар орон нутагт эрүүл мэндийн тусламж үйлчилгээний нэр төрлийг нэмэгдүүлж, төвлөрлийг сааруулах, эдийн засгийн үр ашигтай байдлыг нэмэгдүүлэх, гэмтлийн дараах хүндрэл, нас баралтыг бууруулж өвчтөний амьдралын чанарыг уртасгах мөн салбар дундын хамтын ажиллагааг дээшлүүлж эерэг үр нөлөө бий болгох сайн талтай гэж үзэж байгаа.
Цаашид аймгийн Эрүүл мэндийн газар МУ-ын Засгийн газар, Эрүүл мэндийн яам, аймгийн Засаг даргын 2024-2028 оны үйл ажиллагааны хөтөлбөр “Бүсчилсэн хөгжлийг дэмжиж төвлөрлийг сааруулах” бодлого шийдвэрийн хүрээнд Эрүүл мэндийн хөгжлийн төв, Улсын Нэгдүгээр төв эмнэлэг, Хавдар судлалын үндэсний төв, Гэмтэл согог судлалын үндэсний төв, Эмгэг судлалын үндэсний төв, Эх хүүхдийн эрүүл мэндийн үндэсний төв, Анагаахын Шинжлэх ухааны үндэсний их сургууль зэрэг улсын томоохон эмнэлгүүдтэй хамтран эрүүл мэндийн тусламж үйлчилгээний чанар хүртээмжийг нэмэгдүүлэх тал дээр хамтын ажиллагааны гэрээ байгуулж хэрэгжүүлэхээр ажиллаж байна.
ГССҮТ-ийн нарийн мэргэжлийн эмч нарийн баг манай аймагт ажиллах үеэрээ аймгийн Эрүүл мэндийн газар, аймгийн Нэгдсэн эмнэлгийн удирдлагын багтай уулзаж цаашид хэрхэн хамтарч ажиллах талаар мөн аймгийн Нэгдсэн эмнэлгийн Мэс заслын тасгийн хагалгааны нэгдсэн блокоор орж хүний нөөц, тусламж үйлчилгээ, тоног төхөөрөмжийн нөхцөл байдлыг газар дээр нь үзэж хэрхэн сайжруулах талаар ярилцсан байна.
